مختارات
الرئيسية / ثقافة و أدب / جلطة المذاكرة .. بقلم : مــروة كامـل

جلطة المذاكرة .. بقلم : مــروة كامـل

لما تلاقى الست شعرها واقف زى النخلة اللى من غير بلح و بتشرب 5 فناجين قهوة ف اليوم غير النسكافية و الشاى وكل المنبهات اللى ف الدنيا علشان تقدر تواصل بقية اليوم ولما تلاقيها عمالة تبلبع ف المسكنات زى المدمنين علشان تقدر تسيطر على الشواكيش اللى عمالة تدق فوق نفوخها و تهدى البراد اللى عمال يغلى فدماغها و الصويت يشتغل عمال على بطال زى السارينة بتاعة عربية الاسعاف ولما تلاقى شباشب بتطير فوق دماغك زى الطيارات الهليكوبتر ولما تلاقى كلمة مش عاوزة غباء) بتتكرر اكتر من 10 مرات فالدقيقة و لما تلاقى كراريس بتتقطع و كتب بتترمى ف كل حتة ولما جوزك ميحبش ياخد اجازة غير يوم الجمعة (علشان مفيش مدارس ولا مذاكرة )ولما العيال يجرو منك ف كل حتة هربا من سهام شبشبك ولما تربطى دماغك اخر كل شهر زى ما يكون دماغك هتهرب (علشان الامتحانات الشهرية) ولما تلاقى الخناقات اشتغلت علشان المصروف ولما تلاقى حظر التجوال اشتغل ف البيت من الساعة 8 وتبقى زى العيال الصغيرين بتنامى بدرى علشان تصحى بدرى ولما تافى ف البيت زى النحلة علشان تخلصى كل طلباتك قبل رجوع البهوات ولما تلغى او تاجلى اى مشوار ليوم الجمعة (بالمناسبة يوم الجمعة دة يوم المشاوير العالمى)و لما تلاقى مدرسين داخلين خارجين عليكى ف البيت وكانك فتحتيها مركز تعليمى ……لما تلاقى الاعراض دى ابتدت تظهر عليكى و على بيتك وولادك ابشرى (تبقى الدراسة ابتدت )تصدقى  انك لو ذاكرتى للماجستير او الدكتوراة ح يبقى اسهل لك مما لو ذاكرتى لولادك …..كانت جدتى اللة يرحمها بتقولنا انا و اصحابى (لما كلكم عاوزين ولادكم يطلعوا الاوائل يبقى مين اللى ح يطلع من الاواخر) وعلشان كلنا بنبقى واخدين الموضوع على صدرنا اوى باللة عليكم مين فيكم اهلها مبيقولولهاش (انت محسسانا انهم ف ثانوية عامة) طب دة انا بالمنظر دة مش ح اكمل لحد الابتدائية ويا اما اركب كرسى بعجل يا اما ح تلاقونى ف العباسية حاجزة جناح يا اما محجوزة ف مستشفى بتعالج من (جلطة المذاكرة) لاء اقولكم انا ح اروح اخد الدكتوراة اسهل ….باى…باى … اشوفكم على خير

تعليقات الفيس بوك

تعليقات الفيس بوك

عن ELkebar-admin

رئيس تحرير مجلة الكبار

اضف رد

لن يتم نشر البريد الإلكتروني . الحقول المطلوبة مشار لها بـ *

*